કવિ શ્રી રાજેન્દ્ર શાહ ને શ્રધ્ધાંજલી

શિયાળુ સાંજ

શિયાળુ સાંજ ની વેળ છે થોડીઃ
હાલ્યને વાલમ! આંચને આધાર ખેલીએ આપણ
નીંદર આવશે મોડી.
ચીતરી મેલી ચોસર,મ્હોરાં સોહ્ય છે રૂડે રંગ,
ધોળિયો પાસો ઢાળિયે,જો'યે કોણ રે જીતે જંગ,
આબરૂ જેવી આણજે થાપણ,
ગઠરી મે'ય ગાંઠ ને છોડી,
હાલ્યને વાલમ! ખેલીએ આપણ,
નીંદરું આવશે મોડી.
નેણથી તો નેણ રીઝતા ને કાન, વેણની એને ટેવ,
વાત કીજે એલા કેમરે ભેટ્યાં ભીલડીને મા'દેવ.
કોણ ભોળુ,કોણ ભોળવાયૂં,
જે કાળજા રહ્યાં વ્હાલથી જોડી !
હાલ્યને વાલમ! ખેલીએ આપણ,
નીંદરું આવશે મોડી.
આપણી કને હોય તે બધુ હોડ માં મૂકી દઈ
હાર કે જીત વધાવી એ આપણ એકબીજાનાં થઈ,
અડધી રાતનું ઘેન ઘેરાતાં
ઓઢશું ભેળા એક પિછોડી;
હાલ્યને વાલમ! ખેલીએ આપણ,
નીંદરું આવશે મોડી.

------------------------ રાજેન્દ્ર શાહ

કેવડિયાનો કાંટો

કેવડિયાનો કાંટો અમને વનવગડામાં વાગ્યો રે,
મૂઈ રે એની મ્હેક, કલેજે દવ ઝાઝેરો લાગ્યો રે.
બાવળિયાની શૂળ હોય તો ખણી કાઢીએ મૂળ,
કેરથોરના કાંટા અમને કાંકરિયાળી ધૂળ;
આ તો અણદીઠાનો અંગે ખટકો જાલિમ જાગ્યો રે,
કેવડિયાનો કાંટો અમને વનવગડામાં વાગ્યો રે.
તાવ હોય જો કડો ટાઢિયો કવાથ કુલડી ભરીએ,
વાંતરિયો વળગાડ હોય તો ભૂવો કરી મંતરીએ;
રૂંવે રૂંવે પીડ જેની એ તો જડે નહિ કહીં ભાંગ્યો રે,
કેવડિયાનો કાંટો અમને વનવગડામાં વાગ્યો રે.

------------------------ રાજેન્દ્ર શાહ