તુ એક ગુલાબી સપનું છે
હું એક મજાની નીંદર છું.
ના વીતે રાત જવાનીની
તે માટે હું પણ તત્પર છું.
ગોતી જો શકે તો લે ગોતી
મોતીના સ્વરૂપે છે જ્યોતિ.
ઓ હંસ બનીને ઊડનારા
હું તારું માનસરોવર છું.
શાંત અને ગંભીર ભલે
શરમાળ છે મારાં નીર ભલે.
ઓ પુનમ ઘુંઘટ ખોલ જરા
હું એ જ છલકતો સાગર છું
કૈલાસનો સચવાયે વૈભવ
ગંગાનું વધી જાશે ગૌરવ
તુ આવ ઉમાનું રૂપ ધરી
ને જો કે હું કેવો સુંદર છું.
સંવાદ નથી શોભા એની છે
મૌન પ્રતિષ્ઠા બન્ને ની.
તુ પ્રશ્ન છે મારી પ્રીતિ નો
હું તારા રૂપ નો ઉત્તર છું.
-----------------------શેખાદમ આબુવાલા
